တယောက်နဲ့ တယောက်ပေါင်းသင်းကြတဲ့အခါ ဆက်ဆံကြတဲ့အခါ အမြဲတမ်းကတော့ ကိုယ့်အလိုကြ ဘယ်တော့မှမဖြစ်နိုင်ပါ၊ အကြောင်းသော်ကား.. သူ့အမြင် ကိုယ့်အမြင်ဆိုပြီး နှစ်မြင်ရှိတက်လို့ပါဘဲ၊ အဲဒီလိုအမြင်နှစ်မျိုးဆိုတာကလည်း နှစ်ဦးစလုံးဟာ အတ္တလူသားတွေပီပီ အတ္တဆိုတဲ့ “ငါ” အပေါ်မှာ အခြေခံကြလို့ပါဘဲ..
တသက်မှာ တကိုယ် သူ့ကိုသာအချစ်ဆုံးဆိုပြီး ပေါင်းသင်းလာကြတဲ့ သူတွေများတောင် အသေးအမွှား လွှဲမှားမှု့ကအစ အကြီမားဆုံးသောရန်သူတွေဖြစ်ကာ.. နောက်ဆုံးလမ်းခွဲကြရတဲ့ အထိဖြစ်ကြတယ်ဆိုတဲ့ သတင်းကြားရတာ ဒုနဲ့ဒေးပါဘဲ၊
အကြောင်းအရာတခု ဆွေးနွေးကြလို့ ညှင်းခုံကြတဲ့အခါ တယောက်နဲ့တယောက် ညှိမရလို့ပြောကြတဲ့အခါ ဟေ့ “မင်းဘက်ကကြည့်ရင် လက်ဖဝါး၊ ငါ့ဘက်ကကြည့်ရင် လက်ဖမိုးကွ” ဆိုကာ လက်သီးလက်မောင်းတန်းပြီး အာခေါင်အာရင်းသန်သန်နဲ့ ပြောကြတာလည်း နေရာတကာမှာ တွေ့နိုင်တာပါ၊
ဟေ့ မင်းဘက်ကကြည့်ရင် လက်ဖဝါး၊ ငါ့ဘက်ကကြည့်ရင် လက်ဖမိုး ဆိုတဲ့စကား စာရေးသူလည်း လက်ခံပါတယ်၊ ဒါပေမဲ့ စာရေးသူတွေးနေမိတာက တချို့ လူတွေဟာ နှစ်ဘက်မြင်သဘောတရားကို လက်ခံကျင့်သုံးသလိုလို တဖတ်လူကိုလည်း နားလည်ပေးပါဆိုတာမျိုး ပြောနေပေမဲ့ ပြောနေသူရဲ့စိတ်ထဲ ပြောနေစဉ်ကာလမှာ မသိမသာ ဒေါသအပေါ်မှာ အခြေခံပြီး ငါ့ဘက်ကကြည့်ရင် လက်ဖမိုးကွ ဆိုတဲ့ အတွေးကိုသာ နေရာပေးကာ …ငါ့မြင်း ငါဆိုင်း စစ်ကိုင်းရောက်ရောက်၊ ငါ့လှေငါထိုး ပဲခူးရောက်ရောက်ဆိုတာမျိုး ကျင့်သုံးပြီး ကျန်တဲ့သူရဲ့ လက်ဖဝါးအမြင်ဝါဒကို သဘောပေါက်ပေမဲ့ လက်မခံနားလည်မပေးနိုင်တဲ့သဘောပါနေတာကိုပါ၊
တဖက်လူကသာ နှစ်ဘက်မြင်သဘောတရားကိုလက်ခံလို့ အလျှော့ပေးလိုက်ရင်တော့ ဒီနေရာမှာပဲ ကိစ္စပြီးပါတယ်၊ အကယ်၍များသာ တဖက်လူကလည်း ရှေ့လူနည်းတူ ငါ့ဘက်ကအမြင်သာအမှန်ပါဟုဆိုကာ တင်းခံနေပါက လက်ဖဝါးအမြင် လက်ဖမိုးအမြင် မပီပြင်တော့ပါ၊
အဲဒီအခါမှာ မပြီပြင်သော မကြည်လင်သော အဆုံးသက်မူ့တွေနဲ့ ..ဟင်း ထင်းခွေမကြုံ ရေခတ်ကြုံတာပေါ့ကွာ ဟုဆိုကာ လက်စားချေတက်ကြပါတော့တယ်၊
စာရေးသူကြားဘူးတဲ့ လက်စားချေတဲ့သာဓက ရှေးတုန်းက ရွာတရွာမှာ ကိုတိုးဆိုသူက တခြားရွာမှာရှိနေတဲ့ သူ့သူငယ်ချင်းကိုမိုး ရှိရာကို အလည်ရောက်လာပါတယ်၊ ဒီနယ်ကိုရောက်တုန်းရောက်ခိုက် ဒေသန္တရ ဗဟုသုတ ရဘို့ဟိုဟိုဒီဒီလှည့်ကြည့်ဘို့ရန်အတွက် ကိုမိုး အိမ်မှာရှိနေတဲ့ မြင်းတကောင်ကို ခနငှါးစီးပြီး လျှောက်လည်ပါတော့တယ်၊ တနေကုန် လျှောက်လည်လို့အားရ ညနေချိန်ကျတော့ အိမ်ပြန်လာတယ်၊ ကိုမိုးလည်း သူ့မြင်းလေးကိုကြည့်ပြီး အတော်လေးသနားနေရှာတယ်၊ ကိုမိုးစိတ်ထဲမှာတော့ ငါမြင်းလေးကို တနေ့ကုန် မညှာမတာစီးထားတာ တနေ့နေ့တော့တွေ့ကြသေးတာပေါ့ကွာ.. ဟုဆိုကာစိတ်ထဲမှာ တေးထားပါတော့တယ်၊
ဒီလိုနဲ့ ကိုမိုးလည်း အကြောင်းကိစ္စတခုပေါ်လာတော့ ကိုတိုးရွာကို ရောက်သွားပါတယ်၊ ကိုတိုးအိမ်ကမြစ်ကမ်းနားဘေးမှာ ဆိုတော့ မြစ်ဘေးချောင်းဘေးနေသူများပီပီ အိမ်တိုင်းမှာ အရေးပေါ်အတွက် လှေတစီးဆီ ရှိကြပါတယ်၊ ကိုတိုးပိုင်တဲ့လှေကိုကြည့်ပြီး ကိုမိုးကလက်စားချေချင်စိတ်တွေတဖွါးဖွါး ပေါ်လာကာ ..ဟ သူငယ်ချင်းငါ့ကိုမင်းလှေ ခနငှါးစမ်းကွာဟုဆိုကာ လှေပေါ်တက်ပြီး အားရပါးရ လှော်ပါတော့တယ်၊ စိတ်ထဲကတော့…ဟား ဟား ငတိုးရာ မင်းငါ့ရွာလာတုန်းက ငါ့မြင်းကို မညှာမတာစီးထားတာ၊ ဒီတခါတော့ မင်းလှေကိုလည်းတအားလှော်လိုက်မယ် လို့တွေးပြီး ကိုတိုးလှေကို တနေကုန်တနေခန်း မြစ်ထဲမှာ တအားသာ အားစိုက်လှော်နေပါတော့တယ်၊
ထိုနည်းတူစွာ ကိုလိုရာတွေးပြီး လက်စားခြေဘို့ကိုသာ စိတ်အားသန်ကာ စိတ်ပင့်ပန်း ကိုယ်ပင့်ပန်း ဖြစ်နေမှန်းမသိ ဖြစ်နေကြတာကို သတိကပ် သ်ိမှတ်စေလိုတာပါ၊
ဟေ့ “မင်းဘက်ကကြည့်ရင် လက်ဖဝါး၊ ငါ့ဘက်ကကြည့်ရင် လက်ဖမိုးကွ” ဆိုကာ လက်သီးလက်မောင်းတန်းပြီး ပြောနေတဲ့ဟန်ပန် အခြေခံ ဒေါသစိတ်ထားသံကိုပြောင်းပြီး..
“မင်းဘက်ကကြည့်ရင် လက်ဖဝါး၊ ငါ့ဘက်ကကြည့်ရင် လက်ဖမိုးပါသူငယ်ချင်းရာ” ဟုဆိုကာ နှစ်ဘက်မြင်ဝါဒကို မေတ္တာရှေးရှု့ကာ စိတ်ထဲကလည်းလက်ခံ ကိုယ်တိုင်လည်းကျင့်သုံးရင်ဖြင့် နှစ်ဦးစလုံးအတွက် နှစ်ဘက်စလုံးအတွက် နှစ်အုပ်စုလုံးအတွက် အဖွဲ့အစည်းနှစ်ခုလုံးအတွက် ….အတွက် ….အတွက်…. အတွက်အသင့်မြတ်ဆုံးဖြစ်နေမယ်ဆိုတာ ယုံကြည်ကာဖြင့်……ယုံကြည်စွာဖြင့်….
0 comments:
Post a Comment